കുവൈത്ത് സിറ്റി: നവംബർ ഇരുപതിന് ആരംഭിക്കുന്ന കുവൈത്ത് ഇന്റർനാഷ്ണൽ ബുക്ക് ഫെയറിൽ കോഴിക്കോട് ഫാറൂഖ് കോളേജ് പങ്കെടുക്കും. കുവൈത്തിലെ നാഷ്ണൽ കൗൺസിൽ ഫോർ കൾച്ചർ, ആർട്ട്സ് ആൻഡ് ലിറ്ററേച്ചർ ആണ് കുവൈറ്റിൽ നിന്നും അറബ് രാജ്യങ്ങളിൽ നിന്നുമുള്ള സർക്കാർ സ്ഥാപനങ്ങളെയും പ്രസാധകരെയും പങ്കെടുപ്പിച്ച് വിപുലമായ ഈ ബുക്ക് ഫെയർ നടത്തുന്നത്. കുവൈത്തിലെ സാംസ്കാരിക രംഗത്തിന് തിളക്കം പകരുന്ന കുവൈത്ത് ഫെയറിൽ ഫാറൂഖ് കോളേജ് അറബി ഗവേഷണ കേന്ദ്രത്തിന്റെ കീഴിൽ പൂർത്തിയാക്കിയ പ്രമുഖ കുവൈത്ത് സാഹിത്യക്കാരി ഡോ. സുആദ് സബാഹിന്റെ എട്ട് കവിതാ സമാഹാരങ്ങളുടെ വിവർത്തനങ്ങൾ നവംബർ ഇരുപത്തിയൊന്നിന് വൈകീട്ട് ഏഴു മണിക്ക് കുവൈത്ത് ഇന്റർനാഷ്ണൽ ബുക്ക് ഫെയറിലെ ദാർ സുഅദ് അൽ സബാഹ് പവലിയനിൽ പ്രകാശനം ചെയ്യും.
ഡോ. മുഹമ്മദ് ആബിദ് യു. പി നിർവഹിച്ച ‘റോസാപ്പൂക്കളുടെയും തോക്കുകളുടെയും സംഭാഷണം’, ഡോ. അബ്ദുൽ ജലീൽ. എം നിർവഹിച്ച ‘കുരുവികൾക്ക് കവിത എഴുതുന്ന നഖങ്ങളുണ്ട്’, ഡോ. അബ്ബാസ് കെ. പി നിർവഹിച്ച ‘നിനക്കുമാത്രമെൻ ഗദ്യവും പദ്യവും’, ഹാസിൽ മുട്ടിൽ നിർവഹിച്ച ‘ആദിയിൽ പെണ്ണുണ്ടായിരുന്നു’, ഡോ. സബീന കെ നിർവഹിച്ച ‘പ്രണയ ലിഖിതങ്ങൾ’, ‘എന്റെ നാട്ടിലേക്കുള്ള അടിയന്തര സന്ദേശങ്ങൾ’, ഫൈറൂസ റാളിയ നിർവഹിച്ച ‘പെണ്ണ് കവിതയാണ്, കവിത പെണ്ണും’, ആയിഷത്ത് ഫസ്ന നിർവഹിച്ച ‘ചക്രവാളത്തിനുമപ്പുറം’ തുടങ്ങിയ വിവർത്തനങ്ങളാണ് അന്തർ ദേശീയതലത്തിൽ ശ്രദ്ധിക്കപ്പെടുന്ന ഈ സാംസ്കാരിക, കലാ സാഹിത്യവേദിയിൽ പ്രകാശനം ചെയ്യപ്പെടുന്നത്. കുവൈത്തിലെ പ്രമുഖ പ്രസാധകരായ ‘ദാർ സുആദ് അൽ സബാ ഹും’ ഫാറൂഖ് കോളേജ് അറബി ഗവേഷണ വിഭാഗവും സഹകരിച്ചാണ് പ്രമുഖ കവയിത്രി ഡോ. സുആദ് സബാഹിന്റെ എട്ട് കവിതാ സമാഹാരങ്ങളുടെ വിവർത്തനങ്ങൾ പുറത്തിറങ്ങുന്നത്. ഡോ. അബ്ബാസ് കെ. പി ആണ് വിവർത്തന പ്രോജക്ട് കോർഡിനേറ്റർ. ദാർ സുആദ് അൽ സബാഹിന്റെ അതിഥികളായി ഫാറൂഖ് കോളേജ് അറബി ഗവേഷണ വിഭാഗത്തിലെ ഡോ. മുഹമ്മദ് ആബിദ് യു. പി, ഡോ. അബ്ബാസ് കെ. പി എന്നിവർ പങ്കെടുക്കും.
