കുവൈത്ത് സിറ്റി: കേരള ദിനം ആഘോഷിച്ച് കുവൈത്തിലെ ഇന്ത്യൻ എംബസി. ആഘോഷം ഇന്ത്യൻ അംബാസഡർ ഡോ. ആദർശ് സ്വൈക ഉദ്ഘാടനം ചെയ്തു. കേരളത്തിലെ കളരിപ്പയറ്റും അനുഷ്ഠാന കലാരൂപമായ തെയ്യവും ചെണ്ട മേളവും തുടങ്ങി വിവിധ പരിപാടികളോടെ ആഘോഷം കെങ്കേമമായി.
വിവിധ മലയാളി പ്രവാസി അസോസിയേഷനുകൾ അതത് ജില്ലയിലെ പരമ്പരാഗതവും സാംസ്കാരികവുമായ കലാപ്രടകനങ്ങൾ ആഘോഷഭാഗമായി അവതരിപ്പിച്ചു.
തിരുവാതിര, കേരളനടനം, നടവിളി, മാർഗംകളി, ദഫ് മുട്ട്, കോൽക്കളി, കൊളുന്ത് പാട്ട്, വള്ളംകളി, ഒപ്പന, ഗസൽ എന്നിവയും അരങ്ങേറി. മാർത്താണ്ഡവർമ്മ, പഴശ്ശിരാജ, കുഞ്ഞാലി മരക്കാർ, ആനി മസ്‌ക്രീൻ, ദാക്ഷായണി നാരായണൻ, അമ്മു സ്വാമിനാഥൻ, ഹെർമൻ ഗുണ്ടർട്ട് തുടങ്ങി കേരളത്തിലെ ചരിത്രപ്രസിദ്ധ കഥാപാത്രങ്ങളെ പരിചയപ്പെടുത്തുന്ന സ്‌കിറ്റുകളും മോണോലോഗുകളും അവതരിപ്പിച്ചു. കേരളീയ കലകളുടെ അതിശയിപ്പിക്കുന്ന അവതരണ മികവിനെ അംബാസഡർ അഭിനന്ദിച്ചു.
