കോഴിക്കോട്: കൊയിലാണ്ടി കുറുവങ്ങാട് മണക്കുളങ്ങര ക്ഷേത്രത്തിൽ വ്യാഴാഴ്ച ഉത്സവത്തിനിടെ ആനകൾ ഇടഞ്ഞതിനെ തുടർന്ന് മൂന്ന് പേർ മരിക്കുകയും 36 പേർക്ക് പരിക്കേൽക്കുകയും ചെയ്തു.ലീല (68), രാജൻ (66), അമ്മുക്കുട്ടി (65) എന്നിവരാണ് മരിച്ചത്. ലീലയും അമ്മുക്കുട്ടിയും കുറുവങ്ങാട് സ്വദേശികളാണ്. പരിക്കേറ്റവരിൽ 21 പേരെ കൊയിലാണ്ടി താലൂക്ക് ആശുപത്രിയിലും പതിനാല് പേരെ കോഴിക്കോട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ഒരാളുടെ നില ഇപ്പോഴും ഗുരുതരമാണ്. ലീലയുടെയും അമ്മുക്കുട്ടിയുടെയും മൃതദേഹങ്ങൾ നിലവിൽ താലൂക്ക് ആശുപത്രിയിലാണെന്നും പോസ്റ്റ്‌മോർട്ടത്തിനായി മെഡിക്കൽ കോളേജിലേക്ക് മാറ്റുമെന്നും കൊയിലാണ്ടി മുനിസിപ്പൽ വൈസ് ചെയർമാൻ കെ സത്യൻ പറഞ്ഞു. കൂടുതൽ കേസുകൾ റിപ്പോർട്ട് ചെയ്യപ്പെടുന്നതിനാൽ പരിക്കേറ്റവരുടെ എണ്ണം ഉയർന്നേക്കാമെന്ന് കൊയിലാണ്ടി പോലീസ് പറഞ്ഞു.
