കുവൈത്ത് സിറ്റി: ചട്ടങ്ങൾ പാലിക്കുന്നതിൽ പരാജയപ്പെട്ടതിന് ഏഴ് സർക്കാരിതര അസോസിയേഷനുകൾ പിരിച്ചുവിട്ട് കുവൈത്ത്. സാമൂഹിക, കുടുംബകാര്യ മന്ത്രി അമതൽ അൽ ഹുവൈലയാണ് പിരിച്ചുവിടൽ തീരുമാനം പുറപ്പെടുവിച്ചതെന്ന് കുവൈറ്റ് മാധ്യമങ്ങൾ റിപ്പോർട്ട് ചെയ്തു. സിവിൽ വർക്ക് സംഘടിപ്പിക്കുന്നതിനും സർക്കാരിതര അസോസിയേഷനുകൾ പ്രാബല്യത്തിൽ ചട്ടങ്ങൾ പാലിക്കുന്നുവെന്ന് ഉറപ്പാക്കുന്നതിനുമുള്ള ശ്രമങ്ങളുടെ ഭാഗമായാണ് തീരുമാനമെന്ന് മന്ത്രാലയം അറിയിച്ചു. പൊതുതാൽപ്പര്യങ്ങൾ സംരക്ഷിക്കുന്ന വിധത്തിൽ സിവിൽ സൊസൈറ്റി പ്രവർത്തനത്തിൻ്റെ ലക്ഷ്യങ്ങൾ നിറവേറ്റുന്നതിനായി സിവിൽ സൊസൈറ്റി പ്രവർത്തനങ്ങൾ നിരീക്ഷിക്കുന്നത് തുടരുമെന്നും ഏതെങ്കിലും ലംഘനത്തിനെതിരെ ആവശ്യമായ നിയമ നടപടികൾ കൈക്കൊള്ളുമെന്നും മന്ത്രാലയം വ്യക്തമാക്കി.
