കുവൈത്ത് സിറ്റി: തനിമ കുവൈത്തിന്റെ ബാനറിൽ സൻസീലിയ എവർ റോളിംഗ് ട്രോഫിക്ക് വേണ്ടിയുള്ള പതിനെട്ടാമത് ദേശീയ വടംവലി മത്സരം ഡിസംബർ 6ന് സംഘടിപ്പിക്കും. അബ്ബാസിയ ഇന്ത്യൻ സെണ്ട്രൽ സ്കൂളിലെ ഓപൺ ഫ്ലഡ് ലൈറ്റ് സ്റ്റേഡിയത്തിൽ ഉച്ചക്ക് 12:00മുതൽ വൈകീട്ട് 8:00മണി വരെയായിരിക്കും മത്സരം നടക്കുക. അന്നേ ദിവസം കുവൈത്തിലെ 26 ഇന്ത്യൻ സ്കൂളുകളിൽ നിന്ന് പഠന-പഠനേതര വിഷയങ്ങളിൽ മികച്ച പ്രകടനം കാഴ്ച വെക്കുന്ന വിദ്യാർത്ഥികൾക്കുള്ള ഡോ: അബ്ദുൽ കലാം പേൾ ഓഫ് ദി സ്കൂൾ അവാർഡ് ദാനവും നടക്കുന്നതാണെന്നും സംഘാടകർ അറിയിച്ചു. ഇതിൽ ഇന്ത്യൻ സ്കൂളിനെ പ്രതിനിധീകരിച്ച് കുവൈത്തി വിദ്യാർത്ഥിയും ഉൾപ്പെടുന്നുണ്ട്.
തനിമ മുൻ ഹാർഡ്‌കോർ അംഗം പരേതനായ രാജു സക്കറിയയുടെ സ്മരണാർത്ഥം രാജു സക്കറിയ നഗർ എന്നു നാമകരണം ചെയ്തിട്ടൂള്ള മത്സരവേദി മുഖ്യാതിഥി മുൻ കായികതാരവു കുവൈത്ത് സംരംഭകനുമായ സുരേഷ് കാർത്തിക്‌ കാണികൾക്കായ്‌ സമർപ്പിക്കും. പൊതുസമ്മേളനത്തിൽ സൗത്ത്‌ ആഫ്രിക്കൻ അംബാസഡർ ഡോ: മനേലിസി പി ഗെൻഗേ മുഖ്യാതിഥിയായിരിക്കും എന്ന് സംഘാടകർ അറിയിച്ചു. യുണൈറ്റഡ് ഇന്ത്യൻ സ്കൂളിൽ ജോലി ചെയ്യുകയും ‘പെൺതനിമ ‘ അംഗമായി മരണപ്പെടുകയും ചെയ്ത ബിന്നി ആന്റണിയുടെ സ്മരണക്കായി ഏർപ്പെടുത്തിയ ബിന്നി ആന്റണി മെമ്മോറിയൽ എജുക്കേഷണൽ എൻഡോവ്മെന്റ് അവാർഡ് ദാനവും നടക്കും. യുണൈറ്റഡ് ഇന്ത്യൻ സ്കൂളിലെ വിദ്യാർത്ഥിക്കാണ് ഈ അവാർഡ്. മാസങ്ങളോളം പരീശീലനത്തിൽ ഉള്ള 20ൽ പരം ടീമുകൾ മാറ്റുരയ്ക്കുന്ന മത്സരത്തിൽ ഇത്തവണ ആദ്യമായ് ലോകത്തിന്റെ വിവിധ ഭാഗങ്ങളിൽ നിന്നുള്ള വടംവലി കായികതാരങ്ങൾ പങ്കെടുക്കുന്നു എന്നതും സവിശേഷതയാണ്. ടഗ് ഓഫ് വാർ ഫെഡറേഷൻ ഓഫ് ഇന്ത്യയുടെ അംഗീകാരത്തോട് കൂടി നടക്കുന്ന മത്സരങ്ങളിൽ നിന്ന് തിരഞ്ഞെടുക്കപ്പെടുന്ന കായിക താരങ്ങൾ ഇന്ത്യയിൽ നടക്കുന്ന ദേശീയ മത്സരങ്ങളിൽ കുവൈറ്റിനെ പ്രതിനിധീകരിക്കും. 5-6 അടിയിൽ അധികം ഉയരമുള്ള എവർ റോളിങ്ങ് ട്രോഫികൾ തനിമ വടംവലിയുടെ മാത്രം പ്രത്യേകതയാണ്. ഓണത്തനിമ കൺവീനർ ദിലീപ്‌ ഡി.കെ., പ്രൊഗ്രാം കൺവീനർ ബാബുജി ബത്തേരി, തനിമ ഓഫീസ്‌ സെക്രെട്ടറി ജിനു കെ അബ്രഹാം , തനിമ ജെനറൽ കൺവീനർ ജോജിമോൻ തോമസ്‌ , തനിമ ട്രഷറർ റാണാ വർഗ്ഗീസ്‌, ഓണത്തനിമ ജോയിന്റ്‌ കൺവീനർ കുമാർ ത്രിത്താല, ഓണത്തനിമ ഫിനാൻസ്‌ കൺവീനർ ഷാജി വർഗ്ഗീസ്‌ എന്നിവർ പത്രസമ്മേളനത്തിൽ പങ്കെടുത്തു.
