കുവൈത്ത് സിറ്റി: ഷുവൈഖ് തുറമുഖത്ത് ഏഷ്യൻ രാജ്യത്തു നിന്നെത്തിയ 40 അടി കണ്ടെയ്നറിൽ ഒളിപ്പിച്ച് കടത്താൻ ശ്രമിച്ച മദ്യം കസ്റ്റംസ് ഓഫീസർമാർ പിടിച്ചെടുത്തു. വീട്ടുപകരണങ്ങൾക്കുള്ളിൽ ഒളിപ്പിച്ചായിരുന്നു കടത്താൻ ശ്രമിച്ചത്. എക്സ്-റേ ഉപകരണം ഉപയോഗിച്ച് നടത്തിയ പരിശോധനയിലാണ് ഇത് കണ്ടെത്തിയത്. ബോക്സുകൾക്കും ഫർണിച്ചറുകൾക്കുമിടയിൽ ഒളിപ്പിച്ച നിലയിൽ ഏകദേശം 12,000 ഓളം കുപ്പി മദ്യമാണ് കണ്ടെത്തിയത്. ആവശ്യമായ കസ്റ്റംസ് നടപടിക്രമങ്ങൾക്ക് ശേഷം പിടിച്ചെടുത്ത വസ്തുക്കൾ ബന്ധപ്പെട്ട അധികാരികൾക്ക് റഫർ ചെയ്തു.
