കാസർഗോഡ്: നീലേശ്വരം അഞ്ചൂത്തമ്പലം വീരേർകാവ് ക്ഷേത്രത്തിൽ ചൊവ്വാഴ്ച പുലർച്ചെ തെയ്യം ഉത്സവത്തിനായി സൂക്ഷിച്ച 30,000 രൂപയുടെ പടക്കങ്ങൾ പൊട്ടിത്തെറിച്ച് നിരവധി പേർക്ക് പരിക്കേറ്റു. 154 പേർക്ക് പരിക്കേറ്റതായാണ് റിപ്പോർട്ടുകൾ. എട്ട് പേർക്ക് 80 ശതമാനത്തിലധികം പൊള്ളലേറ്റു. പടക്കം പൊട്ടിക്കുന്ന സ്ഥലവും സംഭരണശാലയും തമ്മിൽ രണ്ടോ മൂന്നോ അടി അകലമേ ഉണ്ടായിരുന്നുള്ളൂവെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. വടക്കേ മലബാറിലെ തെയ്യം സീസണിൻ്റെ ആരംഭം കുറിക്കുന്ന പ്രധാന വാർഷിക പരിപാടിയായ മൂവാളംകുഴി ചാമുണ്ഡി തെയ്യത്തിൻ്റെ ഒരുക്ക ചടങ്ങായ “കുളിച്ചു തോറ്റം” നടക്കുന്നതിനിടെയാണ് അപകടം. തെയ്യങ്ങളിൽ ഏറ്റവും പ്രബലമായ മൂവാളംകുഴി ചാമുണ്ഡി തെയ്യം വീക്ഷിക്കാൻ ആയിരക്കണക്കിന് ഭക്തർ ക്ഷേത്രത്തിൽ എത്തിയിരുന്നു.
