ഇംഫാൽ: ബിജെപി ഭരിക്കുന്ന മണിപ്പൂരിൽ വംശീയ കലാപം രൂക്ഷമായതിനെ തുടർന്ന് മുഖ്യമന്ത്രി എൻ ബിരേൻ സിംഗ് രാജിവെച്ചു. ഞായറാഴ്ച വൈകുന്നേരം ഇംഫാലിലെ രാജ്ഭവനിൽ ഗവർണർ അജയ് കുമാർ ഭല്ലയ്ക്ക് അദ്ദേഹം രാജി സമർപ്പിച്ചു. ബിജെപിയിലെയും എൻപിഎഫിലെയും 14 എംഎൽഎമാരും സിംഗിനൊപ്പം ഉണ്ടായിരുന്നു. സംസ്ഥാന ബിജെപി പ്രസിഡന്റ് എ ശാരദ, മുതിർന്ന ബിജെപി നേതാവ് സാംബിത് പത്ര എന്നിവരും പ്രതിനിധി സംഘത്തിലുണ്ടായിരുന്നു. വരാനിരിക്കുന്ന നിയമസഭാ സമ്മേളനത്തിൽ തന്റെ സർക്കാരിനെതിരെ അവിശ്വാസ പ്രമേയം കൊണ്ടുവരുമെന്ന ഭീഷണി ഉയർന്നതിനെത്തുടർന്നാണ് ബിരേൻ സിംഗ് രാജിവെച്ചത്. വരാനിരിക്കുന്ന നിയമസഭാ സമ്മേളനത്തിന് മുന്നോടിയായാണ് ഈ പെട്ടെന്നുള്ള നീക്കം. മുഖ്യമന്ത്രിക്കെതിരെ അവിശ്വാസ പ്രമേയം അവതരിപ്പിക്കാൻ കോൺഗ്രസ് പദ്ധതിയിട്ടിരുന്നു.
