കുവൈത്ത് സിറ്റി: കുവൈറ്റിന്‍റെ റോഡ് അടിസ്ഥാന സൗകര്യങ്ങൾ വർധിപ്പിക്കുന്നതിനുള്ള രാജ്യവ്യാപക ശ്രമത്തിന്‍റെ ഭാഗമായി മുബാറക് അൽ കബീർ ഗവർണറേറ്റിൽ റോഡ് അറ്റകുറ്റപ്പണികൾ ആരംഭിച്ചതായി പൊതുമരാമത്ത് മന്ത്രി ഡോ.നൂറ അൽ മഷാൻ അറിയിച്ചു. കർശനമായ ഗുണനിലവാര മാനദണ്ഡങ്ങൾ പാലിച്ചുകൊണ്ട് വേഗത്തിലും കാര്യക്ഷമമായും ജോലി പൂർത്തിയാക്കേണ്ടതിൻ്റെ പ്രാധാന്യം ഡോ. അൽ-മഷാൻ ഊന്നിപ്പറഞ്ഞു. രാജ്യത്തുടനീളമുള്ള 18 പ്രധാന റോഡ് പദ്ധതികൾ ഉൾപ്പെടുന്ന വിപുലമായ സംരംഭത്തിന്‍റെ ഭാഗമാണ് അറ്റകുറ്റപ്പണികൾ. മുബാറക് അൽ-കബീർ ഗവർണറേറ്റിലെ ഏറ്റവും കൂടുതൽ നാശനഷ്ടമുണ്ടായ പ്രദേശങ്ങളിൽ ആദ്യം ശ്രദ്ധ കേന്ദ്രീകരിച്ച് അറ്റകുറ്റപ്പണികൾ ഘട്ടം ഘട്ടമായി നടപ്പിലാക്കും. മികച്ച ഗുണനിലവാരവും സമയബന്ധിതമായി പൂർത്തീകരണവും ഉറപ്പാക്കിക്കൊണ്ട് ഒരു പ്രത്യേക സംഘം പദ്ധതിയുടെ മേൽനോട്ടം വഹിക്കുമെന്ന് ഡോ. അൽ-മഷാൻ ചൂണ്ടിക്കാട്ടി.
