ഹൈദരാബാദ്: മൂർഖൻ പാമ്പിന്‍റെ തല വായ്ക്കുള്ളിലാക്കി വിഡിയോ എടുത്ത യുവാവ് മരണപ്പെട്ടു. തെലങ്കാനയിലെ കാമറെഡ്ഡി ജില്ലയിലാണ് സംഭവം. 20 വയസ്സുകാരനായ ശിവരാജ് ആണ് മരിച്ചത്. റോഡിൽനിന്ന് ശിവരാജ് മൂർഖൻ പാമ്പിനെ വായിലേക്കിടുന്നത് വിഡിയോയിൽ കാണാം. വായിൽ കുടുങ്ങിയ പാമ്പ് രക്ഷപ്പെടാൻ വലയുന്നുണ്ടായിരുന്നു. ശിവരാജിന്‍റെ അച്ഛനും അവനും പാമ്പ് പിടുത്തക്കാരായി ജോലി ചെയ്യുന്നവരാണെന്നും മൂർഖനെ പിടിച്ചതിനെ തുടർന്ന് വിഡിയോ റെക്കോർഡുചെയ്‌ത് വാട്ട്‌സ്ആപിൽ പങ്കുവെക്കാൻ പിതാവ് പറഞ്ഞതനുസരിച്ചാണ് ശിവരാജ് ഇതിന് മുതിർന്നതെന്നും റിപ്പോർട്ടുണ്ട്.
