കുവൈറ്റ് സിറ്റി: മലയാളം മിഷൻ ആഹ്വാനം ചെയ്ത വയനാടിനൊരു ഡോളർ ക്യാമ്പെയിന്റെ ഭാഗമായി മലയാളം മിഷൻ കുവൈറ്റ് ചാപ്റ്റർ മുഖ്യമന്ത്രിയുടെ ദുരിതാശ്വാസ നിധിയിലേക്ക് 3,17,000 രൂപ കൈമാറി. കല കുവൈറ്റ്, എസ്‌.എം.സി.എ, സാരഥി കുവൈറ്റ്, ഫ്രണ്ട്സ്‌ ഓഫ്‌ കണ്ണൂർ, എൻ.എസ്‌.എസ്‌ കുവൈറ്റ്, പൽപക്‌, കെ.കെ.സി.എ മേഖലകളിൽ നിന്നുള്ള വിദ്യാർത്ഥികളും, അധ്യാപകരും, ഭാഷാ പ്രവർത്തകരിൽ നിന്നുമാണ് ക്യാമ്പെയിന്റെ ഭാഗമായുള്ള തുക കണ്ടെത്തിയത്‌. ഓരോ ചാപ്റ്ററുകളിൽ നിന്നും കണ്ടെത്തുന്ന തുകകൾ അത് ചാപ്റ്ററുകൾ തന്നെ മുഖ്യമന്ത്രിയുടെ ദുരിതാശ്വാസനിധിയിലേക്ക് നേരിട്ട് അയയ്ക്കുന്ന രീതിയിലാണ് മലയാളം മിഷൻ പദ്ധതി ആവിഷ്കരിച്ചത്. മലയാളം മിഷൻ കുവൈറ്റ് ചാപ്റ്ററിൽ നിന്നുള്ള ആയിരത്തോളം വിദ്യാർഥികളാണ് ക്യാമ്പയിനിന്റെ ഭാഗമായത്. സഹജീവി സ്നേഹവും മാതൃ ദേശത്തിനോടുള്ള പ്രതിബദ്ധതയും പ്രവാസി കുട്ടികളിൽ വളർത്തിയെടുക്കുക എന്ന ലക്ഷ്യത്തോടെയാണ് മലയാളം മിഷൻ “വയനാടിനൊരു ഡോളർ” എന്ന പദ്ധതി ആവിഷ്കരിച്ചത്. 25 ദിവസം കൊണ്ട് നടന്ന ക്യാമ്പയിനിൽ മലയാളം മിഷനിലെ എല്ലാ കുട്ടികളും പങ്കാളികളായി. മലയാളം മിഷൻ എല്ലാ ചാപ്റ്ററുകളിൽ നിന്നുമായി 50 ലക്ഷം രൂപ കണ്ടെത്തി. ചാപ്റ്ററുകളിൽ നിന്നും അയക്കുന്ന തുകകൾ ക്രോഡീകരിച്ചരേഖ മലയാളം മിഷൻ ഡയറക്ടർ മുരുകൻ കട്ടാക്കടയും ചാപ്റ്റർ പ്രതിനിധികളും ജീവനക്കാരും ചേർന്ന് മുഖ്യമന്ത്രിക്ക് കൈമാറി.
