വയനാട്: പഞ്ചാരക്കൊല്ലിയിലെ വനത്തിനടുത്തുള്ള വീടിന് പുറത്ത് ചത്ത നിലയിൽ കണ്ടെത്തിയ നരഭോജി കടുവയുടെ പോസ്റ്റ്‌മോർട്ടം പരിശോധനയിൽ കഴുത്തിൽ ആഴത്തിൽ മുറിവേറ്റതായി കണ്ടെത്തി. ഞായറാഴ്‌ച രാത്രി മറ്റൊരു കടുവയുമായുള്ള ഏറ്റുമുട്ടലിനിടെയാണ് പുതിയ നാല് മുറിവുകൾ ഉണ്ടായത്. കടുവയ്ക്ക് അഞ്ചിനും ഏഴിനും ഇടയിൽ പ്രായമുണ്ടാകുമെന്നാണ് കരുതുന്നത്.ജനുവരി 24 ന് ആദിവാസി സ്ത്രീയായ രാധയെ കൊന്നത് ഇതേ കടുവയാണെന്ന് വനം വകുപ്പ് ഉദ്യോഗസ്ഥർ സ്ഥിരീകരിച്ചു. ഇരയുടേതെന്ന് സംശയിക്കുന്ന വസ്ത്രങ്ങൾ, മുടി, കമ്മലുകൾ എന്നിവയുടെ അവശിഷ്ടങ്ങൾ മൃതദേഹപരിശോധനയിൽ കണ്ടെടുത്തു. പരിശോധനയിൽ ആന്തരിക മുറിവുകളൊന്നും കണ്ടെത്തിയിട്ടില്ലെന്ന് ചീഫ് വൈൽഡ് ലൈഫ് വാർഡൻ പ്രമോദ് കൃഷ്ണൻ മാധ്യമങ്ങളോട് പറഞ്ഞു.
