കുവൈത്ത് സിറ്റി: വ്യാജ ടിക്കറ്റുകൾ വിറ്റ് ആൾക്കാരെ കബളിപ്പിച്ചതിന് കടുത്ത ശിക്ഷയും പിഴയും വിധിച്ച് അപ്പീൽ കോടതി ഉത്തരവിട്ടു. കുവൈറ്റ് ടവേഴ്‌സിൽ ജോലി ചെയ്യുന്ന ഈജിപ്ഷ്യൻ ജീവനക്കാരനാണ് വ്യാജ കുവൈറ്റ് ടവേഴ്‌സ് ടിക്കറ്റുകൾ അനധികൃതമായി വിറ്റതുമായി ബന്ധപ്പെട്ട കുറ്റത്തിന് ശിക്ഷിക്കപ്പെട്ടത്. 7 വർഷത്തെ കഠിനാധ്വാന തടവിന് ശിക്ഷിക്കുകയും കൂടാതെ, 58,000 ദിനാർ പിഴയുമാണ് വിധിച്ചിരിക്കുന്നത്. ഇയാളെ ജോലിയിൽ നിന്ന് പിരിച്ചു വിടുകയും ചെയ്തു. അനധികൃതമായ എക്‌സ്‌റ്റേണൽ പ്രിൻ്റിംഗ് പ്രസ് ഉപയോഗിച്ച് ഉദ്യോഗാർത്ഥി ഈ ടിക്കറ്റുകൾ പ്രിൻ്റ് ചെയ്‌ത് യഥാർത്ഥ ടിക്കറ്റുകളായി സന്ദർശകരെ കബളിപ്പിച്ചതായി കോടതി കണ്ടെത്തി. അപഹരിച്ച തുകയുടെ ഇരട്ടി പിഴയും ദുരുപയോഗം ചെയ്ത ഫണ്ട് തിരികെ നൽകണമെന്നുമാണ് വിധിയിൽ ഉൾപ്പെടുത്തിയിരിക്കുന്നത്.
