കുവൈത്ത് സിറ്റി: സർക്കാർ ഏകീകൃത ആപ്ലിക്കേഷൻ ആയ സഹേൽ വഴി പുതിയ സേവനങ്ങൾ ആരംഭിച്ച് വിദ്യാഭ്യാസ മന്ത്രാലയം. കുട്ടികളുടെ വിദ്യാഭ്യാസ സംബന്ധമായ അറിയിപ്പുകൾ രക്ഷിതാക്കളെ അറിയിക്കാൻ സ്കൂൾ അധികൃതർക്ക് അവസരം ഒരുക്കുന്നതാണ് പുതിയ സേവനങ്ങളിൽ ഏറ്റവും പ്രധാനമായത്. വരാനിരിക്കുന്ന രക്ഷാകർതൃ-അധ്യാപക മീറ്റിംഗുകൾ, ഹാജർ അഭ്യർത്ഥനകൾ, വിദൂര പഠനത്തിനുള്ള ഷെഡ്യൂളുകൾ, സ്കൂൾ പ്രവർത്തനങ്ങളുമായി ബന്ധപ്പെട്ട നിർണായക അറിയിപ്പുകൾ എന്നിവ ഇനിമുതൽ സഹേൽ ആപ്പ് ഉപയോഗിച്ച് രക്ഷിതാക്കൾക്ക് അറിയാൻ കഴിയും. കുടുംബങ്ങൾക്കും സ്കൂളുകൾക്കുമിടയിൽ മികച്ച ഇടപഴകൽ പ്രോത്സാഹിപ്പിക്കുന്നതിനും മാതാപിതാക്കളെ നന്നായി അറിയുന്നതിനും ഈ സേവനം ലക്ഷ്യമിടുന്നു. വിദ്യാർത്ഥികൾ സ്കൂളിൽ ഹാജരല്ലെങ്കിൽ സ്കൂൾ അധികൃതർക്ക് രക്ഷിതാക്കളെ അറിയിക്കാം എന്നുള്ളതാണ് മറ്റൊരു പ്രധാനപ്പെട്ട ഫീച്ചർ.
