കുവൈറ്റ് സിറ്റി: കുവൈത്തിലെ കൊടുംചൂടിനെക്കുറിന് സമൂഹ മാധ്യമത്തില്‍ പരിഹാസ വീഡിയോ പോസ്റ്റ് ചെയ്ത പ്രവാസിയെ പോലീസ് അറസ്റ്റ് ചെയ്തു. പോസ്റ്റിലൂടെ കുവൈത്തിനെ അപകീർത്തിപ്പെടുത്താന് ശ്രമിച്ചെന്നാരോപിച്ചാണ് അറസ്റ്റ്. കുവൈത്തിലെ അതിശക്തമായ ചൂടില്‍ പൊടിക്കാറ്റിനിടയിലൂടെ കാറില്‍ യാത്ര ചെയ്യുന്നതിന്റെ വീഡിയോ ആണ് ഈജിപ്തുകാരനായ പ്രവാസി ടിക് ടോക്കില്‍ പോസ്റ്റ് ചെയ്തത്. അസഹ്യമായ ചൂടിനെ കുറിച്ച് പരാതി പറഞ്ഞും കുവൈറ്റിലെ കാലാവസ്ഥയെ പരിഹസിച്ചും ചൂടിനെ ശപിച്ചുമൊക്കെ സംസാരിച്ചു കൊണ്ടുള്ളതായിരുന്നു വീഡിയോ. സോഷ്യല്‍ മീഡിയയില്‍ വൈറലായ പ്രവാസിയുടെ വീഡിയോയ്ക്ക് പിന്നാലെ നിരവധി പേര്‍ ഇത്തരം വീഡിയോകളുമായി രംഗത്തുവന്നിരുന്നു. പോലീസ് അറസ്റ്റ് ചെയ്ത ഇയാളെ നിയമനടപടിക്ക് ശേഷം ഈജിപ്തിലേക്ക് നാടുകടത്തുമെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
