ദോഹ: ഫിഫ ലോക കപ്പിന് മുന്നോടിയായി ഖത്തറില്‍ നടക്കുന്ന ഫിഫ അറബ് കപ്പിനുള്ള ടിക്കറ്റ് വില്‍പ്പനയ്ക്ക് തുടക്കമായി. മൂന്ന് ഘട്ടങ്ങളിലായാണ് ടിക്കറ്റ് വില്‍പ്പന ക്രമീകരിച്ചിരിക്കുന്നത്. നവംബര്‍ 30 മുതല്‍ ഡിസംബര്‍ 18വരെ നീളുന്ന മല്‍സരങ്ങള്‍ക്കുള്ള പ്രീസെയില്‍ ബുക്കിംഗിനുള്ള സൗകര്യം ഇന്ന് മുതൽ FIFA.com വെബ്സൈറ്റില്‍ ലഭിക്കുമെന്ന് സംഘാടകര്‍ അറിയിച്ചു.
വിസാ കാര്‍ഡ് കൈയിലുള്ളവര്‍ക്കാണ് ആദ്യഘട്ടത്തില്‍ ടിക്കറ്റ് ബുക്ക് ചെയ്യാൻ മുന്‍ണന നല്‍കുക. ആഗസ്ത് മൂന്ന് മുതല്‍ ആഗസ്ത് 17 വരെയാണ് വിസാ പ്രീസെയിലിന്റെ ആദ്യഘട്ടം. ആദ്യ ഘട്ടത്തില്‍ ലഭിക്കുന്ന അപേക്ഷകള്‍ അനുവദിക്കപ്പെട്ട ടിക്കറ്റുകളേക്കാള്‍ കൂടുതലാണെങ്കില്‍ നറുക്കെടുപ്പിലൂടെയാണ് ടിക്കറ്റിന് അര്‍ഹരായവരെ തിരഞ്ഞെടുക്കുക.
സെപ്തംബര്‍ മധ്യത്തോടെ വിജയികള്‍ക്കും ഭാഗിക വിജയികള്‍ക്കും തീരെ ടിക്കറ്റ് കിട്ടാത്തവര്‍ക്കും അതുമായി ബന്ധപ്പെട്ട അറിയിപ്പ് ലഭിക്കും. സപ്തംബര്‍ 28ന് തുടങ്ങി ഒക്ടോബര്‍ 12 വരെ നീണ്ടുനില്‍ക്കുന്നതാണ് ടിക്കറ്റ് വില്‍പ്പനയുടെ രണ്ടാം ഘട്ടം. ആദ്യമെത്തുന്നവര്‍ക്ക് ആദ്യം എന്ന നിലയിലാണ് ഈഘട്ടത്തില്‍ ടിക്കറ്റ് ലഭിക്കുക. അവസാന മിനിറ്റ് ടിക്കറ്റ് വില്‍പ്പന നവംബര്‍ 2ന് ആരംഭിച്ച് ടൂര്‍ണമെന്റ് അവസാനിക്കുന്നത് വരെ നീളും
