അബുദാബി: പ്രവാസികൾക്ക് ഒരു സന്തോഷ വാർത്ത ബന്ധുക്കളെയും സുഹൃത്തുക്കളെയും സൗജന്യമായി അബുദാബി കാണിക്കാൻ സുവർണാവസരം. ഡിപാർട്മെന്റ് ഓഫ് കൾചർ ആൻഡ് ടൂറിസം ടൈം ഈസ് നൗ എന്ന പ്രചാരണത്തിന്റെ ഭാഗമായാണ് ഇത്തരമൊരു സമ്മാനപദ്ധതി പ്രഖ്യാപിച്ചത്. ഇതിൽ വിജയിക്കുന്നവർക്ക് സൗജന്യ വിമാനടിക്കറ്റും താമസ സൗകര്യവും ഒരുക്കുമെന്ന് അധികൃതർ വ്യക്തമാക്കി. മത്സരത്തിൽ പങ്കെടുക്കുന്നതിനായി അബുദാബിയിൽ സന്ദർശിച്ച സ്ഥലങ്ങളുടെ നല്ല ചിത്രങ്ങൾ ഫെയ്സ് ബുക്കിലോ ഇൻസ്റ്റാഗ്രാമിലോ പങ്കുവയ്ക്കണം. #InAbuDhabi #TimeIsNow എന്ന ഹാഷ് ടാഗ് ഉപയോഗിച്ച് ഈ ചിത്രങ്ങൾ @VisitAbuDhabi എന്നതിൽ ടാഗ് ചെയ്യണം.20 മുതൽ ഒക്ടോബർ രണ്ടുവരെയാണ് മത്സരം.
ചിത്രങ്ങൾ പോസ്റ്റ് ചെയ്യുന്നതോടൊപ്പം അബുദാബിയിൽ കൊണ്ടുവരാൻ ആഗ്രഹിക്കുന്ന രണ്ടു കൂട്ടുകാരുടെയോ, കുടുംബാംഗങ്ങളുടെയോ പേരും നൽകണം. നാലു ദിവസം കൂടുമ്പോൾ വിജയികളെ @VisitAbuDhabi എന്ന സമൂഹമാധ്യമ അക്കൗണ്ടിൽ പ്രഖ്യാപിക്കും.
