ദുബായ്: കോവിഡ് നിയന്ത്രണങ്ങൾക്ക് ശേഷം ദീപാവലി ആഘോഷം വീണ്ടും ഗംഭീരമാക്കാന്‍ ഒരുങ്ങി ദുബായ്. നഗരത്തിന്റെ വിവിധ പ്രദേശങ്ങളില്‍ ദീപാവലിയുടെ ഭാഗമായി ദീപാലങ്കാരങ്ങളും വെടിക്കെട്ടുകളും കലാ സംഗീത പരിപാടികളും സംഘടിപ്പിക്കുമെന്ന് ദുബായ് ഫെസ്റ്റിവല്‍ ആന്റ് റീട്ടെയില്‍ എസ്റ്റാബ്ലിഷ്‌മെന്റ് അറിയിച്ചു.
ഇതിന്റെ തുടക്കമെന്നോണം ദുബായ് ഫിറ്റ്‌നസ് ചാലഞ്ചിന്റെ ഉദ്ഘാടനത്തോടനുബന്ധിച്ച് ഇന്നലെ രാത്രി നടന്ന കരിമരുന്ന് പ്രയോഗം കാണാന്‍ സ്വദേശികളും വിദേശികളും അടക്കം നിരവധി പേരാണ് ജുമൈറ ബീച്ചില്‍ എത്തിയത്.
ഇത്തവണ ദീപാവലിയുടെ ഭാഗമായി ദുബായ് എക്‌സ്‌പോ വേദിയില്‍ മണ്‍ചിരാതുകളില്‍ ദീപം തെളിയിക്കും. നവംബര്‍ നാലു വരെ നീണ്ടുനില്‍ക്കുന്ന ആഘോഷ പരിപാടികളാണ് എക്‌സ്‌പോയില്‍ ഒരുക്കിയിരിക്കുന്നത്. എക്‌സ്‌പോയുടെ പ്രധാന വേദിയായ അല്‍ വസല്‍ പ്ലാസയില്‍ എല്ലാ വൈകുന്നേരങ്ങളിലും ദീപാവലിയുടെ ഭാഗമായുള്ള ആഘോഷപരിപാടികള്‍ നടക്കും. ജൂബിലി സ്‌റ്റേജില്‍ നടക്കുന്ന ലൈറ്റ് നൈറ്റ് @ എക്‌സ്‌പോ പരിപാടിയില്‍ മുന്‍നിര കലാകാരന്‍മാര്‍ പങ്കെടുക്കും. എക്‌സ്‌പോയിലെ ഇന്ത്യന്‍ പവലിയനില്‍ എല്‍ഇഡി രംഗോലി ഉള്‍പ്പെടെയുള്ളവയും അരങ്ങേറും.
