കുവൈത്ത് സിറ്റി: 60 വയസ്സിന് മുകളിലുള്ള പ്രവാസി തൊഴിലാളികളുടെ അധിക ഫീസും ആരോഗ്യ ഇൻഷുറൻസ് ആവശ്യകതകളും റദ്ദാക്കുന്നതുൾപ്പെടെ തൊഴിൽ വിപണി ചട്ടങ്ങളിൽ സുപ്രധാന ഭേദഗതികൾ പ്രഖ്യാപിച്ച് കുവൈറ്റിലെ പബ്ലിക് അതോറിറ്റി ഫോർ മാൻപവർ. നടപടിക്രമങ്ങൾ ലളിതമാക്കാനും പ്രാദേശിക തൊഴിൽ വിപണിയുടെ വഴക്കം വർദ്ധിപ്പിക്കാനുമാണ് ഇത് ലക്ഷ്യമിടുന്നത്. 60 വയസ്സിന് മുകളിലുള്ള പ്രവാസി തൊഴിലാളികൾക്ക് അധിക ഫീസ് നൽകാനോ ആരോഗ്യ ഇൻഷുറൻസ് പോളിസികൾ നൽകാനോ ആവശ്യമില്ലെന്ന് പബ്ലിക് അതോറിറ്റി ഫോർ മാൻപവർ പ്രസ്താവനയിൽ സ്ഥിരീകരിച്ചു. പുതിയ നിർദ്ദേശം അനുസരിച്ച്, വർക്ക് പെർമിറ്റുകൾ നൽകുന്നതിനുള്ള സ്റ്റാൻഡേർഡ് ഫീസ് ഇനി നൽകിയാൽ മതിയാകും. കൂടാതെ, ചെറുകിട, ഇടത്തരം സംരംഭങ്ങളുടെ (എസ്എംഇ) മേഖലയിലെ തൊഴിൽ കൈമാറ്റത്തിന് ആവശ്യമായ സമയം മൂന്ന് വർഷത്തിൽ നിന്ന് ഒരു വർഷമായി കുറച്ചു.
