കുവൈത്ത് സിറ്റി: അനധികൃതമായി കുവൈത്തിലേക്ക് ഫാൽക്കണുകളെയും മറ്റ് പക്ഷികളെയും കടത്താനുള്ള ശ്രമം കോസ്റ്റ് ഗാർഡ് ജനറൽ അഡ്മിനിസ്ട്രേഷൻ പരാജയപ്പെടുത്തി. സംഭവത്തിൽ ഒരു പൗരനെ അറസ്റ്റ് ചെയ്യുകയും പക്ഷികളുള്ള എട്ട് കൂടുകൾ കണ്ടുകെട്ടുകയും ചെയ്തതായി അൽ അൻബ റിപ്പോർട്ട് ചെയ്തു.ഇറാനിയൻ ബോട്ടിൽ നിന്നാണ് പക്ഷികളെ ലഭിച്ചതെന്ന് അറസ്റ്റിലായ പൗരൻ പറഞ്ഞു.
സമുദ്രാതിർത്തി കടന്ന് ഒരു ഇറാനിയൻ ബോട്ട് തീരത്തേക്ക് വരുന്നതായും അതിൽ നിന്ന് മറ്റൊരു ബോട്ടിലേക്ക് സാധനങ്ങൾ കൈമാറുന്നതായും സുരക്ഷാ ക്യാമറയിൽ പതിഞ്ഞിട്ടുണ്ട്. വസ്തുക്കൾ കൈമാറിയ ശേഷം ഇറാനിയൻ ബോട്ട് അതിവേഗം തിരിച്ചു പോയതായും സുരക്ഷാ വൃത്തങ്ങൾ പറഞ്ഞു.
ലഹരി വസ്തുക്കൾ ആണ് ബോട്ടിൽ കൊണ്ടുവന്നതെന്നാണ് സുരക്ഷാ ഉദ്യോഗസ്ഥർ ആദ്യം ആദ്യം കരുതിയത്. പിന്നീട് പിടികൂടി പരിശോധിച്ചപ്പോഴാണ് എട്ട് കൂടുകളിലായി ഫാൽക്കണുകളെയും മറ്റ് പക്ഷികളെയും കണ്ടെത്തിയത്.
