കുവൈറ്റ് സിറ്റി. കേരള ആർട്ട് ലവേഴ്സ് അസോസിയേഷൻ, കല കുവൈറ്റും – BEC എക്സ്ചേഞ്ചും സംയുക്തമായി കുവൈറ്റിലെ ഇന്ത്യൻ സ്കൂളിലെ കുട്ടികൾക്കായി സംഘടിപ്പിച്ച ബാലകലാമേള 2021 ന്റെ സമ്മാനദാനം കല കുവൈറ്റ് അബ്ബാസിയ ഓഫീസിൽ വെച്ച് കോവിഡ് മാനദണ്ഡങ്ങളോടെ നടത്തപ്പെട്ടു. മത്സരങ്ങളിൽ ഏറ്റവും കൂടുതൽ പോയിന്റുകൾ നേടി ഇന്ത്യൻ എഡ്യൂക്കേഷൻ സ്കൂൾ (ഭാവൻസ്) ബാലകലാമേള- 2021 ന്റെ ഓവറോൾ ചാമ്പ്യൻഷിപ്പ് കിരീടം കരസ്ഥമാക്കി. നാലു വ്യത്യസ്ത വേദികളിലായി ആഗസ്ത് 5,6 തീയ്യതികളിലായിരുന്നു ബാലകലാമേള- 2021 ഓൺലൈനായി സംഘടിപ്പിച്ചത്. കുവൈറ്റിലെ വിവിധ ഇന്ത്യൻ സ്കൂളുകളിൽ നിന്നുമായി 700ലധികം വിദ്യാർത്ഥികൾ മത്സരങ്ങളിൽ പങ്കെടുത്തിരുന്നു. വിജയികൾക്കുള്ള ഉപഹാരങ്ങൾ കല കുവൈറ്റ് കേന്ദ്രക്കമ്മിറ്റി അംഗങ്ങളും കലയുടെ സജീവ പ്രവർത്തകരും കൈമാറി.
