വിട പറഞ്ഞ ഫുട്‌ബോള്‍ ഇതിഹാസം പെലെയുടെ സംസ്‌കാരം ചൊവ്വാഴ്ച സ്വന്തം നാടായ സാന്റോസിൽ നടക്കും. തിങ്കളാഴ്ച രാവിലെ മുതല്‍ ചൊവ്വാഴ്ച രാവിലെ വരെ സാന്റോസ് ക്ലബ് സ്‌റ്റേഡിയത്തില്‍ മൃതദേഹം പൊതുദര്‍ശനത്തിന് വെക്കും. പിന്നീട്, സാന്റോസിലെ നെക്രോപോളെ എകുമെന്‍സിയ സ്മാരക സെമിത്തേരിയില്‍ മൃതദേഹം സംസ്‌കരിക്കും. കുടുംബാംഗങ്ങള്‍ മാത്രമാണ് സംസ്‌കാര ചടങ്ങില്‍ പങ്കെടുക്കുക.
സാവോ പോളോയിലെ ആല്‍ബര്‍ട്ട് ഐന്‍സ്റ്റീന്‍ ആശുപത്രിയിൽ ഉദര അര്‍ബുദ ചികിത്സക്കിടെയാണ് പെലെയുടെ അന്ത്യം.വൃക്കയുടെയും ഹൃദയത്തിന്റെയും അസുഖങ്ങളും അദ്ദേഹത്തിനുണ്ടായിരുന്നു. മകള്‍ കെല്ലി നാസിമെന്റോയാണ് മരണവിവരം സാമൂഹിക മാധ്യമത്തിലൂടെ മരണ വിവരം വെളിപ്പെടുത്തിയത്. നവംബര്‍ 29 നാണ് ഇതിഹാസ താരത്തെ സാവോ പോളോയിലെ ആശുപത്രിയില്‍ പ്രവേശിപ്പിച്ചത്. അര്‍ബുദം ഭേദമാക്കാന്‍ കീമോതെറാപ്പി ചികിത്സ നടത്തിയെങ്കിലും വിഫലമാവുകയായിരുന്നു.
