കുവൈത്ത് സിറ്റി: രാജ്യത്ത് വാണിജ്യ വ്യവസായ മന്ത്രാലയത്തിന്റെ നേതൃത്വത്തിൽ വൻ പരിശോധന. അൽ-സിദ്ദിഖ് ഏരിയയിലെ ഒരു ഷോപ്പിംഗ് മാളിൽ നടത്തിയ പരിശോധനയിൽ ഏകദേശം 15,000 പ്രമുഖ ബ്രാൻഡുകളുടെ വ്യാജ വസ്തുക്കൾ പിടിച്ചെടുത്തു. സ്‌ത്രീകളുടെ ഹാൻഡ്‌ബാഗുകളും അറിയപ്പെടുന്ന ബ്രാൻഡ് പേരുകളുള്ള ഷൂസും പിടിച്ചെടുത്തവയിൽ ഉൾപ്പെടുന്നു. നിയമലംഘനം നടത്തിയ കടകൾ ഉടൻ അടച്ചുപൂട്ടുകയും കട ഉടമകൾക്കെതിരെ നിയമനടപടികൾ ആരംഭിക്കുകയും ചെയ്തു. കൂടാതെ, ഫർവാനിയയിലെ കൊമേഴ്‌സ്യൽ ആൻഡ് പ്രഷ്യസ് മെറ്റൽസ് കൺട്രോൾ ടീം ഷോപ്പിംഗ് സെൻ്ററുകളിൽ നടത്തിയ പ്രത്യേക പരിശോധനയിൽ പ്രമുഖ ബ്രാൻഡുകളുടെ 100 വ്യാജ ഹാൻഡ്‌ബാഗുകൾ കണ്ടുകെട്ടി. ജാബ്രിയ കൊമേഴ്‌സ്യൽ കൺട്രോൾ സെൻ്ററിൽ നിന്ന് മുഹമ്മദ് അൽ മുതൈരിയുടെ നേതൃത്വത്തിൽ നടത്തിയ പരിശോധനയിൽ മൂന്ന് കടകളിൽ നിന്ന് വ്യാജ സാധനങ്ങൾ കണ്ടെത്തിയതായി വാണിജ്യ നിയന്ത്രണ വകുപ്പ് ഡയറക്ടർ ഫൈസൽ അൽ അൻസാരി ചൂണ്ടിക്കാട്ടി.
