കുവൈത്ത് സിറ്റി: കുവൈറ്റിലെ പ്രധാന ജയിൽ സമുച്ചയത്തിനുള്ളിൽ തടവുകാർക്ക് സ്വകാര്യ കുടുംബ സന്ദർശനം നടത്താനുള്ള പുതിയ സൗകര്യം ഉടൻ തുറക്കുമെന്ന് ആഭ്യന്തര മന്ത്രാലയം. “ഫാമിലി ഹൗസ്” എന്ന് വിളിക്കപ്പെടുന്ന ഈ പ്രോജക്റ്റ് വിവാഹിതരായ തടവുകാർക്ക് അവരുടെ കുടുംബങ്ങളുമായി കൂടിക്കാഴ്ച നടത്താൻ അനുവദിക്കുന്ന രീതിയിലുള്ളതാണ്. ഔദ്യോഗിക ഉദ്ഘാടന തീയതി പ്രഖ്യാപിച്ചിട്ടില്ല. ജയിൽ സമുച്ചയത്തിനുള്ളിൽ പ്രത്യേകം രൂപകൽപ്പന ചെയ്ത ഭവന യൂണിറ്റുകളിൽ തടവുകാർക്ക് അവരുടെ ജീവിത പങ്കാളികൾ, കുട്ടികൾ, മാതാപിതാക്കൾ, സഹോദരങ്ങൾ എന്നിവരോടൊപ്പം സമയം ചെലവഴിക്കാൻ ഫാമിലി ഹൗസ് സഹായിക്കും. ഈ സ്വകാര്യ കുടുംബ സന്ദർശനങ്ങൾക്ക് ഏതൊക്കെ തടവുകാരാണ് യോഗ്യരെന്നും ഓരോ സന്ദർശനത്തിൻ്റെയും കാലാവധിയും ഭരണകൂടം നിർണ്ണയിക്കും.
