കുവൈത്ത് സിറ്റി: 26-ാമത് അറേബ്യൻ ഗൾഫ് കപ്പ് ഫുട്ബോൾ ചാമ്പ്യൻഷിപ്പിന് മുന്നോടിയായി കർശന നിയന്ത്രണങ്ങൾ ഏർപ്പെടുത്തി കുവൈത്ത്. ജാബർ അൽ-അഹമ്മദ് ഇൻ്റർനാഷണൽ സ്റ്റേഡിയത്തിനും അൽ -നാസർ സ്‌പോർട്‌സ് ക്ലബ് സ്റ്റേഡിയത്തിനും ചുറ്റുമുള്ള പ്രദേശങ്ങളിൽ വിവാഹങ്ങളും സാമൂഹിക കൂടിച്ചേരലുകളും ഉൾപ്പെടെ എല്ലാ പൊതു പരിപാടികളും നിയന്ത്രിക്കുമെന്ന് ഔപചാരിക ആശയവിനിമയത്തിൽ യുവജനകാര്യ സഹമന്ത്രിയുടെ ഓഫീസ് അറിയിച്ചു. കാബിനറ്റ് പ്രമേയം നമ്പർ 2023/1216 പ്രകാരം രൂപീകരിച്ച ഗൾഫ് ചാമ്പ്യൻഷിപ്പിനായുള്ള (26) സുപ്രീം സംഘാടക സമിതിയുടെ ശുപാർശകൾക്കനുസൃതമായാണ് ഈ തീരുമാനം. ഡിസംബർ 21 മുതൽ 2025 ജനുവരി 3 വരെ നടക്കുന്ന, ഏറെ പ്രതീക്ഷയോടെ കാത്തിരിക്കുന്ന 26-ാമത് അറേബ്യൻ ഗൾഫ് കപ്പ് ഫുട്ബോൾ ചാമ്പ്യൻഷിപ്പിനാണ് കുവൈറ്റ് ആതിഥേയത്വം വഹിക്കുന്നത്. സ്റ്റേഡിയങ്ങൾക്ക് സമീപമുള്ള പൊതുയോഗങ്ങൾ പരിമിതപ്പെടുത്തുന്നതിലൂടെ, തടസ്സങ്ങൾ കുറയ്ക്കാനും ടൂർണമെൻ്റിനായുള്ള ട്രാഫിക്, സുരക്ഷാ ക്രമീകരണങ്ങൾ ഒപ്റ്റിമൈസ് ചെയ്യാനും അധികാരികൾ ലക്ഷ്യമിടുന്നുണ്ട്.
