ദുബായ്: അബുദാബി ബിഗ് ടിക്കറ്റിന്റെ ഭാഗ്യ കടാക്ഷം വീണ്ടും പ്രവാസി മലയാളിക്ക്. കൊല്ലം സ്വദേശിയായ നഹീല്‍ നിസാമുദ്ദീനാണ്, ബിഗ് 10 മില്യന്‍ നറുക്കെടുപ്പില്‍ ഒന്നാം സമ്മാനം. ഒരു കോടി ദിര്‍ഹം (20 കോടി ഇന്ത്യന്‍ രൂപ) ആണ് സമ്മനത്തുക . ബിഗ് ടിക്കറ്റിന്റെ 232-ാമത് സീരിസ് നറുക്കെടുപ്പിലാണ് നഹീല്‍ നിസാമുദ്ദീനെ ഭാഗ്യ ദേവത അനുഗ്രഹിച്ചത്
. എന്നാല്‍ വിജയിയായ വിവരം അറിയിക്കുന്നതിന് നഹീല്‍ നിസാമുദ്ദീന്‍ ടിക്കറ്റ് വാങ്ങുമ്പോള്‍ നല്‍കിയ രണ്ട് മൊബൈല്‍ ഫോണ്‍ നമ്പറുകളിലും ബന്ധപ്പെടാന്‍ ശ്രമിച്ചെങ്കിലും സാധിച്ചില്ലെന്ന് അധികൃതര്‍ പറഞ്ഞു. ഫോണിലേക്കുള്ള സേവനം താല്‍ക്കാലികമായി നിര്‍ത്തിവച്ചിരിക്കുന്നുവെന്ന മലയാളത്തിലുള്ള സന്ദേശമാണ് ഫോണ്‍ വിളിക്കുമ്പോള്‍ ലഭിക്കുന്നത്. മൊബൈല്‍ റീചാര്‍ജ് ചെയ്താല്‍ ഫോണ്‍ പ്രവര്‍ത്തനക്ഷമമാവുമെന്ന പ്രതീക്ഷയിലാണ് അധികൃതര്‍. അദ്ദേഹത്തെ ബന്ധപ്പെടാനുള്ള ശ്രമം തുടരുകയാണെന്നും ബിഗ് ടിക്കറ്റ് പ്രതിനിധികള്‍ അറിയിച്ചു. സെപ്തംബര്‍ 26ന് നഹീല്‍ വാങ്ങിയ 278109 എന്ന ടിക്കറ്റ് നമ്പരാണ് ഒന്നാം സമ്മാനത്തിന് അര്‍ഹമായത്.
