ന്യൂഡൽഹി: ഗ്യാനേഷ് കുമാറിനെ അടുത്ത മുഖ്യ തിരഞ്ഞെടുപ്പ് കമ്മീഷണറായി തിങ്കളാഴ്ച നിയമിച്ചതായി നിയമ മന്ത്രാലയം അറിയിച്ചു. തിരഞ്ഞെടുപ്പ് കമ്മീഷൻ (ഇസി) അംഗങ്ങളുടെ നിയമനം സംബന്ധിച്ച പുതിയ നിയമപ്രകാരം നിയമിക്കപ്പെടുന്ന ആദ്യത്തെ മുഖ്യ തിരഞ്ഞെടുപ്പ് കമ്മീഷണറാണ് ഇദ്ദേഹം . അടുത്ത ലോക്‌സഭാ തെരഞ്ഞെടുപ്പ് തീയതി പ്രഖ്യാപിക്കുന്നതിന് ദിവസങ്ങൾക്ക് മുമ്പ്, 2029 ജനുവരി 26 വരെ അദ്ദേഹത്തിന്റെ കാലാവധി തുടരും. 26-ാമത് സിഇസി എന്ന നിലയിൽ, ഈ വർഷം അവസാനം നടക്കുന്ന ബീഹാർ നിയമസഭാ തിരഞ്ഞെടുപ്പുകളും 2026-ൽ നടക്കുന്ന കേരള, പുതുച്ചേരി നിയമസഭാ തിരഞ്ഞെടുപ്പുകളും കുമാർ നിയന്ത്രിക്കും. കുമാർ 1988 ബാച്ച് കേരള-കേഡർ ഐഎഎസ് ഉദ്യോഗസ്ഥനാണ്. കാൺപൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ (ഐഐടി) നിന്ന് സിവിൽ എഞ്ചിനീയറിംഗിൽ ബിടെക് പൂർത്തിയാക്കിയ അദ്ദേഹം ഇന്ത്യയിലെ ഐസിഎഫ്എഐയിൽ ബിസിനസ് ഫിനാൻസും യുഎസിലെ ഹാർവാർഡ് സർവകലാശാലയിലെ എച്ച്ഐഐഡിയിൽ നിന്ന് പരിസ്ഥിതി സാമ്പത്തിക ശാസ്ത്രവും പഠിച്ചു. കേരളത്തിൽ, എറണാകുളം അസിസ്റ്റന്റ് കളക്ടർ, അടൂർ സബ് കളക്ടർ, എസ്‌സി/എസ്ടിക്കായുള്ള കേരള സംസ്ഥാന വികസന കോർപ്പറേഷന്റെ മാനേജിംഗ് ഡയറക്ടർ, കൊച്ചി കോർപ്പറേഷന്റെ മുനിസിപ്പൽ കമ്മീഷണർ തുടങ്ങിയ പദവികൾ വഹിച്ചിട്ടുണ്ട്.
