ഇടുക്കി അസോസിയേഷൻ കുവൈറ്റ് ഓണാഘോഷം “ഓണനിലാവ്2019” അവതരണത്തിലെ വ്യത്യസ്തതകൊണ്ടും ജനപങ്കാളിത്തംകൊണ്ടും, വിവിധ ജില്ലാ സംഘടനകൾ അടക്കമുള്ള കുവൈറ്റിലെ നിരവധി സാംസ്‌കാരിക സംഘടന നേതാക്കളുടെയും, വ്യവസായ പ്രമുഖരുടെയും സാന്നിധ്യം കൊണ്ടും ശ്രദ്ധേയമായി. താലപ്പൊലി, ചെണ്ടമേളം, പുലികളി തുടങ്ങിയവ ആഘോഷ പരിപാടികൾക്ക് മാറ്റുകൂട്ടി.
ഒക്ടോബർ 4 വെള്ളിയാഴ്ച രാവിലെ 10 .00 നു അബ്ബാസിയ നോട്ടിങ്ഹാം ബ്രിട്ടീഷ്സ്കൂളിൽ അരങ്ങേറിയ ആഘോഷപരിപാടികൾ പ്രശസ്ത തെന്നിന്ത്യൻ സിനിമ താരം മനോജ്കെ.ജയൻ ഉത്ഘാടനം ചെയ്തു. ഇന്ത്യൻ എംബസ്സിയുടെ പ്രധിനിധി ആയി ഫസ്റ്റ് സെക്രട്ടറി – കമ്മ്യൂണിറ്റി വെൽഫെയർ ശ്രീ. പി. പി. നാരായണൻ ആശംസ അറിയിച്ചു സംസാരിച്ചു. ഇടുക്കി അസോസിയേഷൻ മുൻ രക്ഷാധികാരിയും മുൻ ഇടുക്കി എം പി യും ആയ അഡ്വ. ഫ്രാൻസിസ് ജോർജ് വേദിയിൽ ആശംസകൾ അർപ്പിച്ചു സംസാരിച്ചു. രണ്ടുഘട്ടമായി നടത്തിയ പരിപാടിയുടെ ആദ്യഘട്ടം രാവിലെ 9.30നു അംഗങ്ങളുടെ കലാപരിപാടികളുംതുടർന്നു വിഭവമായ സമൃദ്ധമായ ഓണസദ്യയോടും കൂടി 2 മണിക്ക് അവസാനിച്ചു. തുടർന്നുസംഗീത പരിപാടി “മൺസൂൺബീറ്റ്‌സ്” അരങ്ങേറി. മനോജ്കെ. ജയനോടൊപ്പം പ്രശസ്ത സംഗീത സംവിധായികയും ഗായികയും, പന്ത്രണ്ടോളം വാദ്യോപകരണങ്ങളിൽ പ്രാവീണ്യം തെളിയിക്കുകയും ചെയ്ത സൗമ്യ സനാതനനും നയിച്ച മൺസൂൺ ബീറ്റ്‌സ് ഓഡിറ്റോറിയം നിറഞ്ഞു കവിഞ്ഞ കാണികളുടെ മനസ്സിൽ സംഗീതത്തിന്റെ കുളിർ മഴപെയ്യിച്ചു.
പരിപാടിയുടെ ഭാഗമായി നടന്നപൊതുയോഗത്തിൽ പ്രസിഡണ്ട് ശ്രീ. സുനിൽകുമാർ അധ്യക്ഷത വഹിച്ചു. സംഘടന ഈ വർഷം ഏറ്റെടുത്തു നടത്തിയ വിവിധ ജീവകാരുണ്യ,സാംസ്‌കാരിക പ്രവർത്തനങ്ങൾ അദ്ദേഹം വിശദീകരിച്ചു. സംഘടനയുടെ ഈ വർഷത്തെ ഏറ്റവും വലിയ ജീവകാരുണ്യപ്രവർത്തനമായ “സഹോദരന് ഒരു വീട്” എന്ന ഭവനനിർമ്മാണ പദ്ധതിയുമായി സഹകരിക്കുന്ന എല്ലാ സുമനസ്സുകൾക്കും അദ്ദേഹം നന്ദിപറഞ്ഞു. ജനറൽ സെക്രെട്ടറി ജോസ് തോമസ് സ്വാഗതം ആശംസിച്ചു. വനിതാ വേദി ചെയർപേഴ്സൺ ശ്രീമതി ഷംല ബിജു, യോഗത്തിൽ ആശംസകൾ അറിയിച്ചു സംസാരിച്ചു. വൈസ് പ്രസിഡണ്ട് ടോം എടയോടി, ജോയിന്റ് ട്രെഷറർ ശ്രീ അജീഷ് ലൂക്കോസ് മറ്റ് എക്സിക്യൂട്ടീവ് /അഡ്വൈസറി അംഗങ്ങൾ എന്നിവർ സംഘാടന നേതൃത്വം നൽകി. ട്രെഷറർ ശ്രീ ബിജോയ് കുര്യൻ നന്ദി പറഞ്ഞു. പരിപാടിയോടനുബന്ധിച്ചു സംഘടിപ്പിച്ച ടിക്-ടോക് മത്സര വിജയികൾക്കുള്ള. സമ്മാനദാനം മനോജ് കെ. ജയൻ നിർവഹിച്ചു.
