വിഴിഞ്ഞം തുറമുഖത്ത് സമരം ചെയ്യുന്ന മത്സ്യത്തൊഴിലാളികളുമായി സർക്കാർ ഇന്ന് ചർച്ച നടത്തും. തുറമുഖ നിർമാണത്തിന്‍റെ ഭാഗമായുണ്ടായ തീരശോഷണം മൂലം വീടും തൊഴിലും നഷ്ടമായവരെ പുനരധിവസിപ്പിക്കണമെന്നത് ഉൾപ്പെടെയുള്ള ആവശ്യങ്ങൾ ഉന്നയിച്ചാണ് തിരുവനന്തപുരം ലത്തീൻ അതിരൂപതയുടെ നേതൃത്വത്തിൽ സമരം നടക്കുന്നത്. ഫിഷറീസ് മന്ത്രി വി. അബ്ദുറഹ്മാന്റെ അധ്യക്ഷതയിലാകും നിർണായക ചർച്ച. ഏഴിന ആവശ്യങ്ങളും അംഗീകരിക്കാതെ പിന്നോട്ടില്ലെന്ന നിലപാടിലാണ് മത്സ്യത്തൊഴിലാളികൾ.
ദിവസങ്ങളായി സമരം നടത്തുന്ന തീരദേശ ജനതയുമായി സർക്കാർ തലത്തിൽ ചർച്ചകൾ നടത്താത്തതിനെതിരേ രൂക്ഷമായ പ്രതിഷേധം വിവിധ കോണുകളിൽനിന്ന് കഴിഞ്ഞ ദിവസങ്ങളിൽ ഉയർന്നിരുന്നു. ഇതേത്തുടർന്നാണ് ചർച്ചയ്ക്ക് തയാറാകുന്നത്.
ഫിഷറീസ് മന്ത്രി വി. അബ്ദുറഹ്‌മാൻ വ്യാഴാഴ്ച സമരസമിതി ജനറൽ കണ്‍വീനർ മോണ്. യൂജിൻ എച്ച്. പെരേരയെ ഫോണിൽ വിളിച്ചു. ഡൽഹിയിലുള്ള മന്ത്രി ഇന്നു രാവിലെ കൊച്ചിയിലെത്തും. വൈകുന്നേരം ചർച്ച നടത്താനാണ് സാധ്യത.
