തിരുവനന്തപുരം: മുല്ലപ്പെരിയാര്‍ അണക്കെട്ടിലെ ജലനിരപ്പ് 137 അടിയില്‍ താഴെ മതിയെന്ന് സുപ്രീം കോടതി നിയോഗിച്ച മേല്‍നോട്ട സമിതി. ഈ തീരുമാനം സമിതി ഇന്ന് സുപ്രീംകോടതിയെ അറിയിക്കും. സമീപകാല കാലാവസ്ഥാ വ്യതിയാനങ്ങൾ പരിഗണിച്ചാണ് സമിതി ഈ തീരുമാനത്തിലെത്തിയത്.
മുല്ലപ്പെരിയാർ അണക്കെട്ടിലെ ജലനിരപ്പ് 142 അടിയായി ഉയര്‍ത്തണമെന്ന് കഴിഞ്ഞ ദിവസം ചേര്‍ന്ന ഉദ്യോഗസ്ഥതല ചര്‍ച്ചയില്‍ തമിഴ്നാട് ആവശ്യപ്പെട്ടിരുന്നു. എന്നാല്‍ ഇതിനെ കേരളം എതിര്‍ക്കുകയും 137 അടിയാക്കി ജലനിരപ്പ് നിലനിര്‍ത്തണമെന്നും നിര്‍ദേശിച്ചു. തുടര്‍ന്ന് അണക്കെട്ടിലെ ജലനിരപ്പ് ശനിയാഴ്ച വരെ 138 അടിയില്‍ നിലനിര്‍ത്തുമെന്ന് തമിഴ്നാട് അറിയിച്ചു.
മുല്ലപ്പെരിയാറിലെ ജലനിരപ്പ് വര്‍ധിക്കുകയും ജലം പുറത്തേക്ക് ഒഴുക്കി വിടേണ്ട സാഹചര്യവുമുണ്ടായാൽ ഇടുക്കി അണക്കെട്ടിലേക്കാകും വെള്ളം ഒഴുകിയെത്തുന്നതെന്ന് കേരളം യോഗത്തില്‍ അറിയിച്ചു.
