പുതുവത്സര രാത്രിയിൽ സ്കൂട്ടറിൽ സഞ്ചരിക്കവെ യുവതിയെ കാർ ഇടിച്ചു വീഴ്ത്തി റോഡിലൂടെ വലിച്ചിഴച്ച് യുവതിയെ കൊലപ്പെടുത്തിയ സംഭവത്തിൽ പ്രതികളായ അഞ്ച് പേർ അറസ്റ്റിൽ. അഞ്ജലി സിങ്ങ്(20) ആണ് കൊല്ലപ്പെട്ടത്. ദീപക് ഖന്ന(26), അമിത് ഖന്ന(25), കൃഷ്ണൻ(27), മിഥുൻ(26), മനോജ് മിത്തൽ(27) എന്നിവരെയാണ് അറസ്റ്റ് ചെയ്തത്.
മാരുതി സുസുക്കി ബലേനോ കാറാണ് യുവതിയെ ഇടിച്ചത്. കാറിന്റെ നമ്പർ ഉപയോഗിച്ചാണ് പൊലീസ് പ്രതികളെ കണ്ടെത്തിയത്. കാർ യുവതിയുടെ സ്കൂട്ടറിലിടിച്ചാണ് അപകടമുണ്ടായതെന്ന് പ്രതികൾ പൊലീസിന് മൊഴി നൽകുകയായിരുന്നു. കാറിനൊപ്പം യുവതിയെ വലിച്ചിഴച്ചത് അവർ അറിഞ്ഞില്ലെന്നും പ്രതികൾ മൊഴി നൽകിയതായി ഡൽഹി പൊലീസ് ഓഫീസർ ഹരേന്ദ്ര കെ സിംഗ് അറിയിച്ചു. സംഭവത്തിൽ ഡൽഹി വനിത കമ്മീഷൻ പൊലീസിനോട് വിശദീകരണം തേടിയിട്ടുണ്ട്. വളരെ ഭയപ്പെടുത്തുന്ന സംഭവമാണ് നടന്നതെന്ന് വനിത കമ്മീഷൻ സ്വാതി മലിവാൾ ട്വീറ്റ് ചെയ്തു.
