തുടർച്ചയായ രണ്ടാം ഒളിമ്പിക‍്‍സിലും രാജ്യത്തിൻെറ അഭിമാനമുയർത്തി മെഡൽനേട്ടവുമായി പിവി സിന്ധു. റിയോ ഒളിമ്പിക്സിൽ ഫൈനലിൽ പരാജയപ്പെട്ട സിന്ധുവിന് വെള്ളിമെഡലാണ് ലഭിച്ചിരുന്നത്. ഇത്തവണ സെമിയിൽ പരാജയപ്പെട്ടെങ്കിലും വെങ്കല മെഡലിനായുള്ള പോരാട്ടത്തിൽ ചൈനീസ് താരം ഹി ബിങ് ജിയാവോയെ പരാജയപ്പെടുത്തി, സ്കോർ- 21-13, 21-15. ടോക്യോയിൽ വെങ്കലം നേടിയതോടെ സിന്ധു ചരിത്ര നേട്ടത്തിന് ഉടമയാവുക കൂടി ചെയ്തു. തുടർച്ചയായി രണ്ട് ഒളിമ്പിക്സിൽ മെഡൽ നേടുന്ന ആദ്യ ഇന്ത്യൻ വനിത എന്ന നേട്ടമാണ് സിന്ധു സ്വന്തമാക്കിയത്.
