കുവെറ്റ്‌ : പാലക്കാട് എം.പി. വി.കെ. ശ്രീകണ്ഠന്റെ മൂന്ന് ദിവസത്തെ കുവൈറ്റ് സന്ദർശനത്തിൽ ഉൾപെടുത്തി പാലക്കാട് പ്രവാസി അസോസ്സിയേഷൻ ഓഫ് കുവൈറ്റിന്റെ ആഭിമുഖ്യത്തിൽ ‘പാലക്കാടിന്റെ വികസനവും പ്രവാസികളുടെ പങ്കും‘ എന്ന വിഷയത്തെ ആസ്പദമാക്കി മംഗഫ് സംഗീത ഓഡിറ്റോറിയത്തിൽ വച്ച് മുഖാമുഖം സംഘടിപ്പിച്ചു. പരിപാടി ഉദ്ഘാടനം ചെയ്തുകൊണ്ടു നടത്തിയ പ്രസംഗത്തിൽ വി.കെ.ശ്രീകണ്ഠൻ പാലക്കാടിന്റെ ചരിത്ര പ്രാധ്യാനത്തെ കുറിച്ചും നിലവിലുള്ള പിന്നോക്കാവസ്ഥയെ കുറിച്ചുമെല്ലാം വിശദമായി സംസാരിച്ചു. അതുപോലെ കേരളത്തിന്റെ പൊതുവായ വികസനത്തിൽ പ്രവാസികൾ വഹിച്ചു കൊണ്ടിരിയ്ക്കുന്ന പങ്കിനെ കുറിച്ച് അദ്ദേഹം എടുത്തു പറയുകയുണ്ടായി. പാലക്കാടിന്റെ പിന്നോക്കാവസ്ഥ പരിഹരിയ്ക്കുവാൻ പാലക്കാടുകാരായ പ്രവാസികളുടെ പിന്തുണയും സഹകരണവും ഉണ്ടാവണമെന്ന് അദ്ദേഹം പ്രവാസി സമൂഹത്തോട് അഭ്യർത്ഥിക്കുകയുണ്ടായി.
തുടർന്ന് നടന്ന മുഖാമുഖത്തിൽ അംഗങ്ങൾ ഉന്നയിച്ച ചോദ്യങ്ങൾക്കും സംശയങ്ങൾക്കും എം.പി മറുപടി പറഞ്ഞു.
ചടങ്ങിൽ പൽപക് പ്രസിഡന്റ പി.എൻ. കുമാർ അദ്ധ്യക്ഷത വഹിച്ചു. ജനറൽ സെക്രട്ടറി സുരേഷ് പുളിക്കൽ സ്വാഗതവും ട്രെഷറർ പ്രേംരാജ് നന്ദിയും പറഞ്ഞു. പ്രസിഡണ്ട്‌ പൊന്നാട അണിയിച്ചും ട്രഷറർ ഉപഹാരം നൽകിയും എം. പി. യെ ആദരിച്ചു
